Meghalaya-ah Aadhaar Number paih duh tam

Meghalaya-ah mi 300 dawnin an Aadhaar Card tih bo a nih theih nan thuneitu lam an nawr a, Aadhaar Card hmang hian ram leilung fa ni si lo in vote thlak theihna chanvo an neih ve thei dawn nia a lan avangin Aadhaar hi an dodal a ni.

Hmarchhak bial hmun hrang hrangah Aadhaar card vanga buaina hi a chhuak fo tawh a, tuna Meghalaya-a Aadhaar card dona hi Khasi Students Union (KSU) te'n ram leilung fa ni lo tan pawh vote thlak theihna hmanrua a ni dawna an hriat vang a ni. Anni mai bakah hian Kohhran lam pawhin privacy tichhe theia a ngaih vangin a do bawk a, Aadhaar card duh lo tu hi an pun phah ta a niin an tarlang.

Mi 286 chuan Unique identification Authority of India (UIDAI) database aṭanga an Aadhaar number paih sak tura an duhna lehkha hi Meghalaya People Committee on Aadhaar (MPCA) hnenah an thehlut a ni.

MPCA Secretary Auguster Jyrwa chuan November 3 hian Aadhaar campaign zawh a nih tur thu leh hemi hnu hi chuan aadhaar number paih duh tute lehkha hi thuneitu lama an thlen theih a beisei thu a sawi.

Meghalaya-ah hian Aadhaar number nei hi mi nuai 4.63 an awm thu official chuan an tarlang a, hei hi an state mipui 14% a nih thu tarlan a ni bawk.