Sikkim-ah August 1 thleng lockdown pawtsei

Sikkim sorkar chuan an state-a coronavirus leng vanga lockdown puan chu August 1 thleng atan a pawtsei. 

Chief secretary SC Gupta chuan state chhung dinhmunte ngun taka an zirchian hnuah, state puma lockdown hman mek chu August 1, zing dar 6 thleng atana pawhsei an rel tih a sawi. Sikkim-ah hian hun rei tak chhung hri kai an awm loh hnuah, hmun danga tangkhangte an haw khawm hnuah hri kai hi hmuh chhuah ṭan an ni a, tunah hian hri kai hmuh chhuah tawh hi mi 499 awmin an zinga 142 chu enkawl dam an ni tawh. Hri vanga thi hmasa ber, kum 74 mi chu Pathianni khan Gangtok-a sorkar hospital-ah a thi a ni. 

State sorkar chuan zirna in hrang hrangte chu August 31 thleng a la khar chhunzawm dawn tih education minister Kunga Nima Lepcha chuan a sawi bawk. A hmain zirna inte hi August 3 hnu lamah hawn turin sorkar chuan a lo rel tawh a, mahse hri leng mek chungchangah state chhung dinhmunte an enin, pawhsei rih hi an rel a ni. 

Minister Lepcha chuan zirna inte khar chhunzawm ni dawn mah se, zirtirtute chuan online hmangin naupangte lehkha an zirtir chhunzawm zel tur thu a sawi. Zirlaite hriselna leh himna chu sorkar chuan a dah pawimawh ber a, hemi rual hian an zirna pawh ngaihthah theih a ni lo tih a sawi bawk. Zirna in hawn chungchang chu sorkarin a la ngaihtuah ṭha leh dawn a ni, a ti.