Hmarchhakah Covid-19 vanga thi an pung zel

Hmarchhak state hrang hrangah Covid-19 kai hmuh belh zel an ni a, he hripui vanga thi pawh an pung zel. 

Hmarchhak state zinga hripui kai leh hri vanga thi tamna ber, Assam-ah chuan Pathianni thleng khan mi 79 in an thihpui tawh. Pathiannia hri vanga thi zingah Karbi Anglong district-a divisional forest officer (DFO) Jaysingh bey a tel. Assam-ah hian hri kai hmuh chhuah hi mi 32,228 an tling tawh a, an zinga 24,040 chu enkawl dam an ni tawh. 

Pathianni khan Tripura-ah Covid-19 kai pahnih an thih belh leh a, an state-ah he hri vanga thi hi mi 13 an awm tawh a ni. Law minister Ratan Lal Nath chuan thite hi kum 76 leh 84 mi, Gomati district hospital leh ILS hospital-a enkawl laite an ni tih a sawi. An pahnih hian natna dang nei sa, kal ṭha lo leh lung ṭha lo an ni tih a sawi bawk. Tripura-ah hian hri kai hmuh tawh hi mi 3,883 awmin, an zinga 2,336 chu an dam tawh a, hri kai enkawl mek mi 1,517 an la awm. 

Nagaland-ah pawh Pathianni vek khan Covid-19 kai enkawl lai, kum 82 mi chu Dimapur-a Covid-19 hospital-ah a thi. Nagaland-a hripui vanga thi pangana a ni a, thite hi an vaiin Dimapur mi an ni. Report-in a tarlan danin, Nagaland-a Covid-19 vanga thi hi diabetic niin, open heart surgery leh pulmonary tuberculosis nei tawh a ni. July 16 aṭang khan enkawl niin, thawk lamah harsatna a neih avangin ventilator hmanga enkawl a ni. 

Meghalaya-ah mi pangain hripui hi an thihpui tawh a, Arunachal Pradesh-ah Covid-19 vang hian mi pathum an thi tawh bawk. Sikkim-ah Pathianni khan mi pakhat a thi leh bawk. Hetih lai hian hmarchhak state zingah Manipur leh Mizoram-ah chuan hripui thihpui hi an la awm lo.