AP : Dawr 100 chuang kang vangin official 2 suspend

Arunachal Pradesh sorkar chuan Thawhlehni zinga Naharlagun bazar-a kangmei chhuaka dawr 700 chuang kangral chungchangah, official pahnih chu an hna ngaihthahah puhin a suspend.

Bazar-a dawr neitute chuan kangmei a chhuah hian an bul hnaia fire station-ah an tlan nghal a, mahse thawktu tumah an lo awm lo niin an sawi. A hnuah kangṭhelhtu pawl an lo thlenin kang ṭhelhna tur tui an nei tam tawk lo tih an sawi bawk.

Hemi chungchang hi chhui chian niin, kangmei chhuah laia Naharlagun fire station-a officer in charge leh zan lam staff duty chu an hna an ngaihthah nia sawi a ni a, Nilaini khan suspend order tihchhuah nghal a ni. Thil awmdan hi uluk taka chhui zui zel a ni tih sorkar thuchhuah chuan a sawi.

Superintendent of Police (Capital) Jimmy Chiram chuan fire department-in an chhui zawh hma chuan kangmei chhuah chhan tak hi sawichian theih a la ni lo tih a sawi.

Bazar kang hi Aruanchal Pradesh-a bazarpui upa ber a ni a, Naharlagun police station leh fire station bul hnaia awm a ni. SP chuan kangmei chhuak Naharlagun leh Itangar-a kang ṭhelh motor pali hmangin ṭhelh a ni a, thawktu pawh an awm ṭha tawk niin a sawi bawk. Mahse Naharlagun-a tui lakna lamah harsatna an neih avangin tui hi km 5 vela hla, Lekhi Iran factory ami an la a ni. Dawrte hi mau leh thing hmanga sak an nih avangin a kangkai chak hle a ni.

Chief minister Pema Khandu chuan dawr neitute chu sorkarin a theih angin a puih tur thu a sawi.