Assam-ah Sweden mi 3 man an ni

Assam police-te chuan an visa kalha sakhaw thila punkhawmnaa tel, Sweden mi pathum chu Nilaini khan an man a, an ramah thawn kir an ni dawn tih an sawi.

Sweden mi an mante hi Hannah Mikaela Bloom, Marcus Arne Henrik Bloom leh Susanna Elizabeth Hakansson-te an ni. United Churches Fellowship leh Bless Assam Mission Network-ten Achabam Ghinai playground, Namrup-a October 25-27 chhunga 'Peace and Healing Prayer Festival' an buatsaiha tel turin Namrup-ah hian an kal a ni.

Namrup DSP, Naba Kumar Borah chuan heng mi pathumte hi tourist visa hmanga kal an ni a, mahse an visa pek dan kalhin, Namrup-ah hian sakhaw thila punkhawmnaah telin, thute pawh an sawi a ni, a ti. Tourist anga kal an nih avangin sakhaw lam thilah an inhnamhnawih tur a ni lo, a ti.

Borah chuan heng mi pathumte hi visa norms an bawhchhiat avangin Foreigns Act hnuaiah man a ni a, mahse Sweden leh India-te hi ram inṭhianṭha tak an nih avangin thubuai siamsak an ni hran lo a, an ram lamah thawnkir erawh an ni dawn tih a sawi. Nimin khan Sweden lamah thawn kir leh nghal hi an tum a ni.

Assam police-te chuan an state-a khualzin lut, visa norms bawhchhiate an dap zel tur thu an lo sawi tawh a, a bikin Bangladesh aṭangin tourist visa hmanga lut, state chhung hmun hrang hranga sakhaw thila inhmuhkhawmna dang a awm fo leh si niin an sawi. Biswananth district-ah pawh Bangladesh aṭanga lut mi 17 an lo man tawh bawk a ni.