Agartala-a inkahna thleng vangin Tripura CM bang turin phut

Tripura-a Trinamool Congress (TMC) chuan Thawhlehni zana Agartala khaw daia inkahna thleng chu an dem thu sawiin, he thil thleng chungchangah BJP kaihhruai sorkar chu na takin an dem a, chief minister Manik Saha chu bang turin an phut.

BJP sorkarna hnuaia state chhunga dan leh thupek dinhmun chhe zel vangin CM chu bang tura phutin, an state-ah chuan President's Rule puan a ngai a ni tiin TMC hruaitu leh Rajya Sabha MP Susmita Devi chuan a sawi.

Devi chuan, "Chief Minister chuan state chhung boruak chhe zelah mawhphurhna lain, banna thehlut nghal rawh se," a ti.

Thawhlehni zana Natun Nagar-a restaurant kawta inkahna thleng chu mafia group pahnihte inbeihna a ni tih police-te chuan an sawi. He inkahna thlengah hian mi pahnihin hliam an tuar a ni.

Sub Divisional Police Officer (SDPO) Sadar Ajay Kumar Das chuan he inbeihna hi gang pahnih, helai biala project hrang hrang thawh meka thuneitu zawk nih inchuhna avanga thleng niin a sawi. Pawikhawihna thlenga inhnamhnawiha puh mi pahnih man an ni tawh a, mi dang pathum pawh zawn mek an nih thu a sawi.