Tuilian vangin Assam-ah mi 3 thih belh

Assam state-a tuilian vangin Pathianni khan mi pathum an thih belh leh. Tuilian vanga thi hi mi 102 an tling tawh a ni. Assam State Disaster Management Authority (ASDMA) in report a tih chhuahah, tuilian hi state chhunga district 23 ten an la tuar a, mi nuai 25-ten harsatna an la tawk mek a ni. 

Tuilian tuarte chhawmdawlna tura sorkarin relief camp 269 a siamah mi 46,000 chuang an la khawsa mek. Pathianni khan tuilian hian tlemin ziaawm lam a pan a, lui lian hrang hranga tuite chu an kam deuh ṭan a ni. Kaziranga National Park and Tiger Reserve (KNPTR) hmun 85% chu tuilian hian a chim tawh bawk. Mahse KNPTR director P Sivakumar chuan Park chhunga tuilian hi zawimuangin a kam ṭan tih a sawi. Hetih lai hian Central Water Commi­ssion (CWC) chuan vawiin aṭangin Assam leh Meghalaya-ah ruah nasa takin a sur leh dawn tih a sawi a, hei vang hian tuilian pawh hi a la ziaawm mai a rinawm lo.