Ramri chungchangah Assam CM nen kan inbe leh thuai dawn: Meghalaya CM

Assam-Meghalaya ramri buaina la neihte chinfel dan tur ngaihtuahin, Assam chief minister Himanta Biswa Sarma nen inbiakna an nei leh thuai dawn tih Meghalaya chief minister Conrad Sangma chuan a sawi.

State pahnihte hian March thla khan ramri buaina an neihna hmun 12 zinga hmun parukah inremna an siam tawh a, a bak hmun paruk dangah pawh inremna siam tumin hma an la chho leh mek a ni.

CM Sangma chuan ramri chungchang buaipui tura state sorkar pahnihten a hran ve vea an ruat, regional committee-te chu an hmu phawt ang a, hemi hnu hian chief minister pahnihte chuan inbiakna hi a chhunzawm dawn a ni, a ti.

Meghalaya sorkarin regional committee a dinte chuan ramri hi tlawhin, meeting pawh an lo nei tawh tih CM chuan a sawi bawk.

CM-in Secretariat thar sak tumna hmun endik
Meghalaya chief minister Conrad K Sangma chuan Ningani khan New Shillong Township-a Meghalaya Secratariat thar sak tumna hmun a endik. CM hi urban affairs minister Sniawbhalang Dhar-a'n a ṭawiawm a ni.

Chief Minister chuan Secretiriat pumpui leh, sorkar department dangte pawh New Shillong Township-a sawn theih dan ngaihtuah a duh thu a sawi. A sawnna tura thlan hi hmun pahnih, New Shillong Township leh Mawpdang area an nei tih a sawi a, khawi hmun zawk nge mipuite tana ṭha leh awlsam zawk tur tih pawh an ngaihtuah tih a sawi. New Shillong Township chu an enfiah hnuah, he hmunah ram acre 220 vela zau chu Secretariat leh department dangte dahna turin ruahmanna an siam tur thu a sawi. Mawpdang area-ah pawh ruahman lawk angin office ṭhenkhat dah a ni dawn tih a sawi bawk.