APPSC paper leak chungchang CBI-in a chhui ṭan

Arunachal Pradesh Public Service Commission (APPSC) examination question paper leak chungchang chu Central Bureau of Investigation (CBI)-in chhui ṭanin, Ningani khan thubuai a ziaklut.

CBI hian he thubuai chhui hna hi state sorkarin a ngen angin vigilance department-a Special Investigation Cell (SIC) kut aṭangin a lachhawng a, SIC SP Anant Mittal pawhin evidence-te chu CBI kuta hlan vek a ni dawn tih a sawi. Ni nga hnuah hei hi an tihfel vek hman a beisei thu a sawi a ni.

Hetih lai hian Arunachal Pradesh sorkar chuan AAPSC member pali la awmte chu a ban bawk. Sorkarin thupek a tihchhuah hma hian Commission member pahnih, Major General (Retd) Ganesh Singh Bisht leh Major General (Retd) Jarken Gamlin-te chuan Ningani khan governor BD Mishra hnenah banna an thehlut a ni. Hemi hma hian Commission chairman Nipo Nabam pawh a lo bang tawh a, APPSC secretary Jayanta Kumar Ray leh joint secretary Suraj Gurung-te chu suspend an ni thung.

Chief minister Pema Khandu chuan APPSC chu thenfai a, siamṭhat a nih tur thu a lo sawi tawh a, state cabinet chuan Commission siamṭhatna atan member ṭanglaite chu ban vek an nih theihna atan Governor chu Article 317 lekkawh turin a rel. An thurel hi CM chuan Governor hnenah hian a thlen a ni.