Assam : NHIDCL in NH-37 siam zo thuai dawn

National Highway and Infrastructure Deve­lopment Corporation Limited (NHIDCL) chuan Assam Chief Minister Sarbanada Sonowal-a hnenah, Nagaon leh Dibrugarh inkar kawngpui, National Highway-37 siamṭhat hna chu nimin khan an ṭan thu leh, ni 15 chhunga an zawh vek tur thu a hrilh.

NHIDCL hnathawh dan enfiahnaah NHIDCL Director VK Rajawat chuan, bitumen topping hna pawh kumthar Ja­nuary-ah chuan zawh hman an in beisei thu a sawi. Sarbananda Sonowal pawh hna an thawh dan chungchanga a mittlung lo lai te hrilhin tuna an hna kalpui mek pawh hi zo thuai tura a duh thu a sawi ve bawk.

CM chuan kawngpui siam hna thawhna kawngah, NHIDCL in hna chak zawka a thawh theih nan state sorkar leh sorkar laipuiin inbiakna mumal tak an neih a pawimawh thu sawiin, NHIDCL hnuaia hnathawk te chu ni tina an thawh tur fel taka duang turin a chah bawk.

Sonowal chuan PWD con­tractor ṭhenkhat, an hna thawh ṭha lo leh hun tiam hnua an hna la zo lo te lakah department-in hma la se a duh thu leh FIR hial pawh thehlut se a duh thu a sawi bawk a ni.

NHIDCL Director chuan Dibru­garh bypass NH pawh kum thar March thlaah chuan zawh hman a nih tur thu a sawi a, Dituk­cherra leh Balacherra inkar kawng pawh biadoc technology hmanga siam a nih tur thu a sawi bawk.

He meeting-a NHAI aiawha kalte chuan Chief Minister hnenah kawng siamna tur esti­mate 14 lai an thehluh tawh thu an hrilh bawk a ni.