Assam-ah missionary hna thawka puh German mi 7 manin thubuai siamsak an ni

Assam police-te chuan Zirtawpni liam ta khan visa pek an nih dan bawhchhia a, Kristian missionary hna thawka puhin German mi pasarih an man.

Police-te chuan German mi an mante hi tourist visa hmanga lut an ni a, mahse an visa norms bawhchhiain missionary hna hi an thawk niin an sawi. Hemi hma lawk hian hetiang case bawkah hian Sweden mi pathum manin, an ram lamah an lo thawn kir tawh bawk.

Special director general of police Gyanendra Pratap Singh chuan, "Tourist visa pek an ni chungin sakhaw lam thilte an thawk a ni. Sakhaw lam thil an buaipui dawn a nih chuan missionary visa an la zawk tur a ni. Sum chawitir an nih bakah, visa norms an bawhchhiat avangin India ram chhuahsan tura tih an ni bawk," a ti.

Police-te chuan heng German mi pasarihte hi sakhaw kaihhnawih thila an tel ngei a ni finfiahna video pawh an nei niin an sawi. Foreigners' Act-a Section 14 hnuaiah thubuai siamsak an ni a, USD 500 theuh chawitir an ni bawk.