Meghalaya : Rally neihnaa buaina chhuak chungchang police-ten an chhui

Meghalaya police-te chuan kar liam ta Zirtawpnia Federation of Khasi Jaintia and Garo People (FKJGP) huaihawta Shillong khawpuia rally neihnaa buaina chawk chhuaktute an chhui mek tih an sawi.

FKJGP hian an state-a hnathawh nei lo, unemployment rate sang zel duh lohna lantir leh, sorkar hna hrang hranga post ruakte a rang thei anga hnawhkhat tura phutin rally hi ah huaihawt a, an kawngzawhnaah hian buaina chhuakin mi pathumin hliam an tuar a, motor eng emaw zat tihchhiat a ni bawk.

He thil thleng kaihhnawihah hian police-te chuan thubuai pahnih an ziak lut tawh. Shillong City SP Vivek Syiem chuan, "Buaina chawkchhuaktu leh motor leh thil dang suasamtute hi kan la manchhuak chiah lo a, a tam zawk hian mask leh lukhum te an vuah a, hei vang hian hriatchhuah mai an har a ni. Mahse, theihtawpin manchhuah ngei tumin kan bei mek a ni," a ti.

East Khasi Hills district thuneitute chuan FKJGP hnenah hian rally huaihawt chungchanga an intiamkamna an siamte an zawm loh avangin show-cause notice a pe tawh bawk. District deputy commissioner I Laloo chuan organisation hnenah hian rally chu boruak ṭha tak hnuaia neih a nih theihna tura hma la tura hriattir an ni a, mahse hei hi an zawm lo a ni, a ti. Buaina chhuaka hliam tuar mi pathumte hi rally-naa tel ve ni lo, kawnga kalte nia sawi an ni bawk.