Arunachal : Chakma te'n AAPSC exam phal loh dem

Chakma Tribals' apex body-te chuan Inrinni khan thuchhuah siamin, Arunachal Pradesh Public Service Commission (AAPSC)-in civil service exam thei tur list aṭanga Chakma candidate pali a paih chu an dem thu sawiin "chi inthliarna rapthlak ber" a ni, an ti.

APPSC hian Inrinni khan Chakma pali, Aruna­chal Pradesh Service Com­bined Competitive Examinations (APPSCCE) 2017 preliminary round exam tura report awm vek tawh chu exam thei tur list aṭangin an hming an paih leh a ni. Hei hi Arunachal Chakma-te chuan an dem hle a, nasa taka sawiselin human rights palzutna ang hialin an ngai.

Chakma National Council of India Vice President, Prahlad Chakma chuan APPSCCE exam-a tel phal loh an nih theihna dan hi pakhatmah a awm loh thu sawiin, heng an mi paih leh tak te hi an pianna leh kawng hrang hrang aṭanga chhut pawhin India khua leh tui diktak an nih thu a sawi.

CNCI Assam committee hotu, Dangu Sambhu Dhan Chakma pawhin Delhi High Court thuchhuah siamah Chakma, India rama piangte chu Citizenship Act Section 3(1)(a) hmangin India khua leh tuia pawm an nih thu a sawi a, he thil dik lo tak hi kaltlangpui a nih chuan court-ah thu kan thlen ang, a ti.

Arunachal Pradesh-a chama cheng te hian Supreme Court-ah citizenship an ngiat a, hei hi Arunachal leilung neitu diktak te chuan an sawisel nasa hle a, Arunachal-a pawl hrang hrang-te chuan Chakma-te hi foreigner-ah an ngai a ni. Tuna Chakma candidate an paih leh tak te hi a tirin AAPSC chuan exam thei tur list-ah a telh a, mahse All Arunachal Pradesh Students Union (AAPSU) leh pawl hrang hrang te'n nasa taka an sawisel hnuah an hming hi an paih leh ta a ni.