Meghalaya-ah Joint Training Warfare nei dawn

Ramdang sipaite leh India sipai te'n vawiin hian Meghalaya-a Umroi Canton­ment-ah Joint Training War­fare an nei dawn.

Training Warfare Centre buatsaihah hian India leh Bangladesh Sipai-te chuan terrorist beih let dan tur training an nei dawn a, an training exercise hming hi SAMPRITI 2017 a nih dawn thu official thuchhuah chuan a tarlang.

India sipaite hian Belgaum, Vairengte leh Bakloh-ah pawh joint training centre hi nei tho mah se Umroi Eastern Command-a Joint Training Node hmasa ber leh changtlung ber a nih vangin hemi hmunah hian joint training hi an nei dawn a ni. Thuchhuahin a tarlan dan chuan kumthar lamah hian China leh Myanmar sipaite nen pawh joint training neih leh an tum.

Shillong-adefence thupuangtu chuan training an neihna tur hmunah hian facility changkang ber ber a awm thu a sawi a, Jungle lane shooting leh facilities dang changkang tak tak, khawvelah pawh a ṭha ber chi a awm thu a sawi bawk a ni.

Exercise SAMPRITY 2017 hi thawh hniha ṭhen a ni dawn a, pakhat zawk Command Post Exercise (CPX) hi Umroi Joint Training Node-ah November 6-11 inkar hian neih a ni ang a, Field Training Exercise (FTX) hi chu Counter Insurgency and Jungle Warfare School, Vairengte, Mizoram-ah November 6-18 chhung hian neih a ni dawn thung a ni.

CPX-ah hian ram pahnih aiawh sipai officer 20 ve ve an tel ang a, FTX-ah erawh hi chuan Bangladesh Sipai Infantry Company khat leh India sipai Red Horns Division-te an tel thung ang.