Sorkar school 1,000 thuam ṭhat an ni dawn : Assam CM

Assam chief minister Himanta Biswa Sarma chuan state chhunga education sector siamṭhatna tura hma lak zel a nih tur thu leh, hemi peng pakhat atan hian sorkar school 1,000 infrastructure thuam ṭhat a ni dawn tih a sawi. School thuam ṭhatna atan hian state sorkar chuan Rs vbc 5,000 vel a seng dawn a ni.

Pathianni khan Chief Minister hian Guwahati-a education institution panga a tlawhin infrastructure-te a endik a, zirna leh zirna in tihchangtlunna tura hma lak a nih tur thu hi a sawi.

Chief Minister school panga a tlawhte tan hian infrastructure thar, hmun awl zau nuam tak leh class room changkang zawk siamnatur blue print buatsaih turin PWD a hriattir nghal a ni. State chhunga high school leh higher secondary school 1,000 te infrastructure tihhmasawnna turin hma an la mek tih a sawi a ni.

Hemi rual hian zirna in, kum 100 chuanga upa tawhte chu a building hlu takte chu tichhe loin, cheithat a, humhalh dan sorkar chuan a ngaihtuah zawk dawn a ni, a ti.

State sorkar hian a hmalakna hmasaah Guwahati leh a chhehvelah school 10 chu a thuam ṭha phawt dawn a ni. Hemi zawhah hian assembly constituency tinah school 8-9 a thuam ṭha leh ang. Kum 2026-ah chuan school 1000 thuam ṭhat hna chu zawhfel a ni ang tiin, hemi hnu hian a thawh hnihna atan school dang 2,000 thuam ṭhat a ni leh ang, tiin a sawi. Kum 10 chhungin state chhunga sorkar school zawng zawng chu thuam ṭhat hman an tum thu a sawi a ni.