AP-a Aqua Park siamna atan sorkar laipuiin Rs vbc 43.59 sanction

Sorkar laipui chuan Arunachal Pradesh-a fisheries sector tihhmasawnna atan, Aqua Park siamna tur cheng vaibelchhhe 43.59 a sanction.

Aqua park hi Lower Subansiri district-a Ziro Valley-a Tarin-ah siam a ni ang. Ziro Valley hi Apatani tribe chenna bial a ni a, leilet siam bakah sangha khawi lam an uar hle.

Sorkar laipui chuan he project atana a sum pek tur hi instalment-in ṭum liin a pe dawn tih official-te chuan an sawi.

Kum 1985-86 khan North East Council (NEC) scheme hnuaiah Tarin Fish Farm siam a lo ni tawh a, he farm hi hectare 7.4 chuanga zau niin, sangha khawina dil 74 vel a awm. Khualzinte pawhin an tlawh nasa ṭhin a ni.

Arunachal Pradesh fisheries minister Tage Taki chuan Aqua Park-ah hian an state-a sangha chi hrang hrangte dah an ni dawn a, sangha khawitute tan training centre a ni nghal dawn bawk tih a sawi. "Kum thum liam taah khan prime minister Narendra Modi chuan Pradhan Mantri Matsya Sampad Yojana (PMMSY) hnuaiah state leh union territory tinah Integrated Aqua Park (IAP) pakhat siam vek a nih tur thu a lo puang tawh a ni," tiin an state-a siam a ni dawn ta chu lawmawm a tih thu a sawi. Hyderabad-a National Fisheries Development Board hnenah pawh ṭum hnih kal tawhin, he project siam tur chungchangah mithiamte pawh a lo biak tawh thu minister chuan a sawi bawk.