Meghalaya : Shillong-ah CrPC Section 144 puang

Meghalaya-a East Khasi Hills district magistrate Isawand Laloo chuan Shillong khawpuiah pressure group-ten 'suprise rally' an neih thut tur venna atan, mi panga aia tam punkhawm khapna CrPC secton 144 chu khawpui pumah Thawhṭanni aṭang khan thupek dang awm leh hma chu hman a ni tih a puang.

DM Laloo chuan he thupek hi rally neihte pawikhawina thlenna remchang atana hman a, vantlang tibuai zawnga thiltih awm tur venna atana tih a nih thu a sawi. Hemi rual hian he thupek hian sakhaw thila punkhawmna erawh a huam tel lo tih sawiin, mahse sakhaw thil kaihhnawiha punkhawmna siam dawn chuan phalna lak hmasak tur a ni, a ti.

Laloo chuan NGO, pressure group leh organisation hrang hrangten tun hnaiah Shillong khawpui chhungah lungawilohna lantira punkhawmna an huaihawt fo a, hengahte hian district thuneitute kaihhruaina dan an siamte chu zawm a ni ngai lo niin a sawi.

October 28-a rally neih ṭuma buaina nasa tak chhuak chuan mipuite rilru a tichiai a, school naupang leh nu leh pate thlengin a ngawng a ni, tiin DM chuan a sawi. "NGO leh group ṭhenkhat pawhin 'surprise rally' neihte an la tum nia hriat a ni a, hei vang hian thupek hi siam a ni," tiin a sawi.