Tripura : Agartala-a Congress party office suasam

Tripura khawpui, Agartala-a Indranagar Congress office chu Thawhṭanni khan misual ṭhenkhatin an suasam a, party flag, office cheina leh prime minister hluite thlalak an tarte an tihchhiatsak.

Congress worker-te hi prime minister hlui Indira Gandhi thih champha hmangin party office-ah hian an kalkhawm a, an awmkhawm lai hian misualte hian an bei a ni. Local block Congress president Manik Chakraborty pawh kut an thlak tel.

BJP MLA hlui, Congress party zawm ta Asish Kumar Saha chuan, "Chief Minister chuan sorkar rorelna ṭhat thu a sawi lai rengin, a party worker-te chuan a thusawi dik loh zia hi an rawn tilang a ni. Chief Minister thusawi letling zelin an party worker-te hi an che ṭhin a ni," a ti.

Congress party worker-te chuan dinhmun harsa zawkte puih tuma hma an laknaah, hmun hrang hrangah vau leh kutthlakte an tawk niin Saha chuan a sawi bawk.

Saha chuan Thawhṭannia an hun hman hrang hrangah beihna an tawh thu sawiin," Nation level-programme hnuaiah Congress worker-te chuan hmun hrang hrangah Narayan Seve an huaihawt a ni. Mi harsate hnenah chaw leh ei tur dangte an sem a ni. Mahse BJP thlawp misualte chuan Siddhi Ashram area, Udaipui leh Shalgarah-a ei tur semna tur hmun kan siamte chu beiin an tichhia a ni," a ti. Udaipur-ah BJP worker-te chuan Youth Congress leader Partha Saha kut thlakin hliam na tak a tuar tih a sawi a, GB Bazar area-ah an party hmeichhe worker-te chu BJP mi leh sate mawi lo taka an khawih thu a sawi bawk. "Tripura Congress social media co-ordintor Sunirmal Chakraborty chu heng hmeichhiate venhim a tum avangin BJP misualte chuan an vaw bawk a ni," a ti.

Congress party mi leh sate chunga pawikhawihna thleng hrang hrang vang hian FIR pawh an thehlut nghal a ni. Indranagar area-ah party worker-te chuan lungawi lohna lantirin kawng an dang a, mahse police-te ngenna avangin an titawp zui leh nghal a ni. Police-te chuan pawikhawihtute hi rang taka man chhuah an tiam a ni.