AP : Kum 2014 aṭanga APPSC exam buatsaih CBI chhui tir tum

Arunachal Pradesh Public Service Commission (APPSC)-in kumina examination a buatsaiha question paper leak chu Arunachal Pradesh sorkar chuan chhui turin Central Bureau of Investigation (CBI) a lo ngen tawh. Hemi hnu hian APPSC exam buatsaih ṭhin hi kum 2014 aṭanga chhui chiang turin ngen leh a tum.

Thawhṭanni khan APPSC assistant engineer (Civil) examination paper leak chungchangah chief minister Pema Khandu kaihhruaiin meeting neih leh a ni. Meeting-ah hian home minister Bameng Felix bakah All Arunachal Pradesh Students’ Union leh All Nyishi Students’ Union executive member-te an tel.

State sorkar in APPSC exam lo buatsaih ṭhinah thil dik tawk lo a awm leh awm loh chhui chian a, dik lo a awm chuan mawphurtute chungah na taka hremna lekkawh ngei a tum a ni tiin official-te chuan an sawi.

Chief Minister Khandu pawhin a twitter-ah hemi chungchang hi tarlangin, a kaihhruai sorkar chuan sorkar hna laknaah dik leh thianghlim taka thil kalpui a nih theihna turin hma a la zel dawn a ni, a ti.

AP sorkar hian Arunachal Pradesh State Combined Competitive Examination (APPSCCE) exam thei tur kum bithliah pawh tihpun a tum a, cabinet meeting neih leh hmasa berah an ngaihtuah dawn a ni.