Nagaland CM leh a hote'n sorkar laipui dawr

Nagaland buaina chungchanga sorkar laipui dawr tura kal, Chief Minister TR Zeliang hoa fehchhuak te chuan, kar liamta Inrinni khan sorkar laipuia hotu lian te mai bakah Naga National Political Groups (NPPGs) paruk hotute pawh an hmu nghal.

TR Zeliang leh a hote hian Union Home Minister Rajnath Singh an hmuh zawh hnuah Pa­thianni khan Union Minister of State for Development of North Eastern Region Dr Jitendra Singh an hmu leh a ni. He meeting-ah hian Prime Minister Narendra Modi-a Secretary, IAS Bhaskar Khulbe pawh a tel a ni. Nagaland team hian Ajit Doval, National Security Advisor (NSA) pawh an hmu bawk.

Zeliang hian PM Modi chu a ruahmanna siam te vangin a fak hle a, Naga political issue pawh chinfel vat a nih tur thu a sawi bawk tih Nagaland Chief Minister office thuchhuah chuan a tarlang. Zeliang chuan inthlanpui neih hma ngeia he buaina chinfel hi ni thei se a duh thu a sawi a, kum 20 chuang he thubuai chingfel tura inbiakna hi kalpui a nih tawh thu a sawi bawk a, nakkum kumtira assembly inthlan neih a nih hma ngeia buaina chinfel a ṭul thu a sawi bawk a ni.

Nagaland Lok Sabha MP Neiphiu Rio pawhin BJP sorkarna Assam, Manipur leh Aruncahal Pradesh-te nena hemi chungchang chinfel hi a hunlai tak a nih thu leh Christmas hma ngeia chinfel a pawimawh thu a sawi.

Naga Peace talk-a Rajnath Singh leh Dr Jitendra Singh an tel vanga an lawm thu Nagaland team te hian an tarlang tel a ni.

Sorkar laipui hotu liante an hmuh zawh hnu hian Chief Minister leh a pawlte bakah Lok Sabha MP Neiphiu Rio telin NNPGs pawl paruk Working Committee (WC) te nen meeting an nei ve leh bawk a, he meeting ah hian NNPG hruaitu eng emaw zat an tel.

Meeting an neihnaah hian Zeliang chuan NNPGs hruaitute an tel chu lawmawm a tih thu leh, Naga buaina pawh chinfel vat a nih a beisei thu a sawi.

Naga buaina hi kum 70 zeta rei a ni tawh a, tun hnaiah Nationalist Socialist Council of Nagaland (NSCN-IM) te'n Greater Naga­land (Nagalim) an ngiat avangin buaina a tam leh zual a, hemi chingfel tur hian Chief Minister bakah Nagaland political party hrang hrang awiawhte chu sorkar laipui nena inbiakna nei tur hian an fehchhuak a ni.

NNPGs hruaitute chuan Chief Minister TR Zeliang hmalakna chu fakawm an tih thu an sawi ve bawk a, hun rei tak chhung Naga polictics buaina awm chu chinfel thuai a nih an beisei thu an sawi.

Nagaland Chief Minister chuan Nagaland sorkarin buaina chingfel tura theihtawp a chhuah thu a sawi ve bawk a ni.