Meghalaya-ah India leh Bangladesh-in joint training ṭan

India leh Bangladesh sipai-te chuan Thawhṭanni aṭang khan Meghalaya-ah joint training an nei ṭan a, he joint training hian Inrinni thleng a awh ang.

Shillong aṭanga Km. 25 a hla, Umroi Cantonment Joint Training Node-ah Thawh­­ṭan khan joint trai­­ning hi Gajraj Corps Co­mman­der Lt Gen A.S Bedi-an a hawng a, Red Horns Divison Commander Maj. Gen. P.S. Behl pawh he hunah hian a tel a ni.

He joint training hming hi Exercise SAMPRITI tih a ni a, a hawnna hunah hian Bangladesh sipai officer 14 leh Indian Army officer 20 an tel a ni.

Exercise SAMPRITI buat­saih a nih chhan hi ram pahnih sipaite inkarah inkungkaihna ṭha a awm theihna tur a nih mai piah lamah terrorist beihlet dan tur-te an zir dawn a ni.

India sipaite hian joint training centre hi Belgaum, Vairengte leh Bakloh-ah te nei mah se Umroi hi Eastern command-a hetiang training awm hmasa ber a ni a, hman­rua pawh a changtlung ber a ni. Kumthar lamah chuan Myanmar leh China sipaite nen joint training hi neih an beisei thu India army official-te chuan an tarlang.