Arunachal CM leh Assam Rifles DG inhmu

Arunachal Pradesh Chief Minister Pema Khandu leh Assam Rifles Director General Lt General Shokin Chauhan-te chuan Thawhṭanni khan an inkawm a, state chhunga thil thleng hrang hrang chungchang an sawidun.

Pema Khandu hian Chauhan hnenah hian state chhunga Sainik school pathum din tura ruahmanna awm chung­chang sawipuiin, Defence Ministry hnen aṭangin tun hnaiah phalna pawh an hmuh tawh tih a sawi. Khandu chuan Arunachal aṭanga sipai officer tam tak a hmuh thuai a beisei thu a sawi bawk.

CM hian Changlang Dis­trict-a Vijaynagar station-a Assam Rifles awm te chungchang a sawipui bawk a, heng lai vela facilities tih­changtlun a ṭul thu te, kawng chhiat vanga harsatna an tawh ṭhin thu a sawi bawk. Indo-Myanmar border-a free movement regime (FMR) chu dik lo taka hman a nih thu leh ruihhlo tawlh ru leh dan loa ramri kan an tam phah thu a sawi bawk a ni. Khandu chuan kumtharah Tirap, Changlang leh Longding district a tlawh hunah Assam Rifles hotute a hmuh duh dawn thu a hrilh nghal bawk a ni.

General Chauhan pawhin Assam Rifles chu nasa zawka hmarchhak lam hawi tura a duh thu a sawi. Hmarchhakah tribal hnam hrang hrang an awm thu sawiin, Scheduled caste hnuaia hna ruak tam tak pawnlam miin an hnawhkhat ṭhin chu tribal mite ngeiin hnawhkhat thei se a duh thu a sawi bawk.

Inkawmna an neihah hian Changlang-Khonsa route highway siamṭhat chungchang pawh sawi dunin, Assam nena inkalpawh a awlsam dan tur pawh an sawidun a ni.