Congress-in Assam-ah sub-Bharat Jodo Yatra nei ṭan

Congress party chuan Thawhlehni khan Assam-a Dhubri district-ah Bharat Jodo Yatra an nei ṭan.

Ni 70 chhung kea kalin, km 834-a thui an kal dawn tih party hruaitu chuan a sawi.

Congress party hian Rahul Gandhi kaihhruaiin Bharat Yodo Yatra an nei mek a, Kanyakumari aṭanga kal ṭanin Kashmir thleng an kal dawn a, km 3,570-a thui an kal dawn a ni. He yatra-in a paltlang loh tur state-ah te chuan Congress party hian sub-yatra hi an lo buatsaih ve a ni.

Dhubri district-a sub-yatra ṭanna neihah hian Congress national secretary-cum-in charge Assam Jitendra Singh,Assam Pradesh Congress Committee (APCC) president Bhupen Kumar Borah, Lok Sabha MP Pradyut Bordoloi leh senior leader-te an tel. Yatra neih ṭan hma hian party hruaitute chu temple, satra, mosque leh gurudwara-ahte an ṭawngṭai hmasa a ni.

Dhubri aṭang hian Bongaigaon, Barpeta, Nalbari, Kamrup, Guwahati, Morigaon, Nagaon, Golaghat, Jorhat, Sivasagar, Dibrugarh leh Tinsukia-te kaltlangin, Sadiya-ah an tawp ang. APCC President Borah chuan yatra neih chhung hian party hruaitu 13-te chuan an ho ṭhin dawn tih a sawi.