Tripura-ah DGP-level conference nei dawn

Tripura chief minister Manik Saha chuan November 8-9 hian DGP North East Regional Conference an thleng dawn tih sawiin, hmarchhak state pariata DGP chu an tel vek beisei a ni tih a sawi.

Chief Minister Saha chuan hmarchhak state hrang hrangte hian tun hnaiah ruihhlo tawlh a hluar chhoh vang leh, ruihhlo vanga buaina an tawh chho fo avangin meeting neih tur hi a pawimawh dawn hle a ni, a ti. State hrang hranga police-te thawhhona chak leh zau zawk siamna atan a pawimawh dawn tih a sawi bawk.

Home ministry changtu ni bawk, CM Saha chuan a kaihhruai sorkarin police leh TSR force chu thuam changkan zel a tum thu a sawi a, force-te tana software-run gadget, machine leh hmanraw pawimawh hrang hrangte pek tumin hma an la mek a, heng hmanruate hi thil chhuizuina atana ṭul leh pawimawh an ni, a ti.

Eptu party-ten Tripura-a dan leh thupek dinhmun a chhe hle nia an sawi chungchang pawh chhangletin, Saha chuan, "Kum li leh a chanve liamta aṭangin state chhunga dan leh thupek dinhmunin hma a sawn chho hle a ni. Police-te chuan pawikhawihtute leh khawtlang buaina siam zawnga chete lakah na takin action an la nghal zel. Hel zawnga chetna thleng ṭhin pawh an hmetmit tawh," tiin a sawi. Tripura state chu ram pumah crime record hniamna state zingah a tel tih sawiin, hmeichhiate laka pawikhawihna thlen ṭhin dan leh tihtawp chu an dah pawimawh hle a, englai pawha biakpawh theihna tur help desk chu police station-ah siam a ni tih a sawi bawk.