Nagaland : CM-in Naga buaina chinfelna turah President puihna dil

Nagaland chief minister Neiphiu Rio chuan an state tlawhtu, president Droupadi Murmu chu hun rei tak chinfel loha awm tawh, Naga political buaina chinfelna tura hma lakpui a, thlawp turin a ngen.

State sorkarin President Murmu lawmna inkhawm a buatsaihah thu sawiin, Chief Minister Rio chuan Naga buaina chinfelna tura sorkar laipui leh NSCN-IM ten Framework Agreement leh, sorkar laipui leh NNPGS ten Agreed Position an lo ziah tawh dante a sawichhuak.

Naga mipuite chuan an buaina chu chinfel thuai an beisei reng thu sawiin, inremna hi siamfel a nih chuan ṭhalaite dinhmun a ṭha chho ang a, ram economy tan pawh state mipuite chuan tam zawkin tha an thawh thei dawn a ni, a ti.

"Sorkar laipui leh Naga political group-te hian inkahhai leh inbiakna hi kum 26 zet an nei tawh. He buaina hi chinfel a nih theihna tur hian in mi thlawpna kan ngen a ni," tiin CM chuan a sawi.

President Murmu hian Nilaini khan Nagaland hi a thleng a, hemi ni vek hian virtual hmangin state chhung hmun hrang hranga project thawh tur lungphumte a phum nghal a ni. State sorkar a lawmna inkhawm a buatsaiha thu a sawinah, President Murmu chuan Nagaland chu agriculture lamah theihna sang tak a nei tih sawiin, hmarchhak bial pum chu India ram tana organic food hmunpui an nei thei a ni, a ti. Nagaland-a thlai leh thei tharchhuahte chu a quality a ṭha a, demand pawh a san thu sawiin, Naga tomato, Naga fanghma leh Naga hmarcha tharchhuahte chu GI tagged an ni tawh a ni, a ti.

President hian ni li thangin hmarchhak state pathum - Nagaland, Mizoram leh Sikkim-te a tlawh dawn a ni.