Meghalaya : Eiruk thubuaiah Meghalaya police AIG man

Meghalaya-a police department-a eirukna thleng chungchangah assistant inspector-general (AIG) Gabriel K Iangrai chu Nilaini khan man a ni. AIG K Iangrai hi a chenna in aṭangin man a ni.

Meghalaya police department-in motor a lei chungchangah thil dik tawk lo a awm nia sawi chu additional inspector general of police (IGP), Mukesh Kumar Singh kaihhruai high-level team in an chhui a, an thil chhuinaah hian motor lei danah thil fel tawk lo bakah, fuel coupon-te pawh dik lo taka hman ṭhin a ni tih an hmuchhuak.

Investigation team-in report an thehluhah motor register loh 29 awm thu te, document dik tawk lo leh, thuchhuah ang ni loa motor lak leh man tlawm zawk lei a nih thute an tarlang. Hei bakah hian Meghalaya police headquarters-in motor lakte sem darh leh chungchang pawh AIGP hian a mimalin a khawih vek bawk. Iangrai-a'n motor a kawl mekte leh fuel coupon a pekchhuahte chu a buaipuitu tur thuneitu lam aṭanga phalna engmah awm loa amah thu veka a tih a ni tiin report chuan a tarlang bawk.

Motor-te hi Iangrai thupek angin Police Officer Mess leh MPRO complex-ah dah zel an ni a, a chabite hi a chenna inah a kawl vek zel a ni. Motor register lohte pawh chu Iangrai hian police headquarters aṭanga sanction engmah a awm lo chungin a mimal thil atan a hmang ṭhin nia sawi a ni bawk a ni.