Assam CM hlui quarters-a tui leh electric connection titawp

Assam chief minister hlui Prafulla Kumar Mahanta quarters-a tui leh electric connection chu Nilaini khan titawp sak a ni.

CM hlui chenna hi Assam Assembly complex chhungah a awm a, a quarters aṭang hian insawnchhuak turin vawi tam tak hriattirna pek ni tawh mah se a insawn duh lo niin official-te chuan an sawi. Tunah MLA pawh a ni tawh lo a, hei vang hian chenna enkawl zui hi Assembly Secretariat mawhphurhna a ni tawh lo tih an sawi bawk.

Chief Minister hluite chenna tur ngaihtuahsak chungchangah General Administration Department chu nodal agency a ni.

Assembly Secretariat hian April thla khan MLA-te awmna tur in hi a thar sak a rel a, hei vang hian May thla khan MLA zawng zawng pawh an awm mekna chu chhuahsan turin hriattir an ni tawh. MLA quarters hlui hi Assam-type niin, a bang pawh mau leh a chhuat thing hman a ni. MLA-te chenna tur, chhawng ruka sanga sakah ṭhenkhat awm mah se, quarters indaihlohna avang hian Assam-type in sakah hian mi eng emaw zat an khawsa a ni. Hei vang hian in sak thar hi peih fel a nih hma chu MLA-te hi Dispur pawn lamah in luah phalsakin, Secretariat hian in luah man thla tin Rs 60,000 a pe a ni.

Official chuan, "Hriattirna pek an nih hnuah MLA 55 zinga 55% vel chuan an quarters hi an chhuahsan tawh a, inpeih hmanlote pawh August 15 thleng khan hun pek a ni. Hetih lai hian CM hlui Prafulla Kumar Mahanta erawh chuan hun a dil belh zel a ni," a ti.