GST Council Meeting Guwahati-ah nei dawn

Assam Finance Minister Himanta Biswa Sarma chuan thuchhuah siamin, Zirtawpni hian Goods and Services Tax (GST) council meeting chu Guwahati-ah neih a nih tur thu a sawi.Sarma chuan he meeting neih tur hi a pawimawh hle tih sawiin, July thla aṭanga hman ṭan GST thlir letna an neih dawn thu a sawi bawk.

Himanta Biswa Sarma chuan GST meeting neih hma ni, vawiin hian state hrang hranga Finance Minister te'n meeting an neih tur thu a sawi. GST Council meeting hi Union Finanace Minister Arun Jaitley-a kaihhruaina hnuaiah neih a ni dawn a ni.

Meeting neihna tur hi chhan hrang hrang a awm thu sawiin, Sarma chuan a chhan bulpui berah chuan thla thum chhung kalpui tak chhiah lak dan thar chu enlet a nih dawn thu a sawi. He meeting-ah hian committee hrang hrang - composition committee, rationalisation of rates committee leh GST Network committee te'n report an thehlut dawn a, heng report te hi an thlir ho nghal dawn tih Sarma chuan a sawi.

Assam Finance Minister chuan GST Council Guwahati-a neih turah hian state 24 in an tel tur thu an tihchian tawh thu a sawi a, Gujarat leh Himachal Pradesh Finance Minister-te erawh an state inthlan a hnaih tawh avangin an kal thei dawn lo a ni, a ti. Heng bakah hian Andhra Pradesh, Mizoram, Nagaland, Sikkim leh Tripura-te chuan an kal dawn leh dawn loh thu an la sawi lo tih tarlangin Bihar, Manipur leh Pudicherry state te aiawh tur hian Chief Minister-te an tel dawn thu a sawi bawk.

Sarma chuan Ningani leh Zirtawpni hian sorkar mi pawi­mawh 200 velin an state an tlawh dawn thu a sawi a, heng zingah hian state chhunga mi pawimawh ber ber te an tel dawn a ni, a ti. VVIP-te chu an duh anih chuan , Kamakhya temple leh Kaziranga National park-ah te hruai an inhuam thu a sawi bawk a ni.

Minister chuan Assam econo­mic dinhmun chuan hma lam a pan thu sawiin, August thlaa state revenue cheng vaibelchhe 330 chu October thlaah cheng 486-ah a kai thu a sawi.