BJP sorkarin Indian Federal System thlak tum : Tripura CM

Tripura Chief Minister Manik Sarkar chuan Thawhlehni khan thuchhuah siamin, BJP kaihhruai sorkar laipui chuan Indian federal structure chu presidential form of government-a thlak a tum thu a sawi.

Manik Sarkar hian Prime Minister Narendra Modi leh a kaihhruai sorkarin Presidential form of government siam a tum thu hi Russia November Revolution Centenary lawmnaah a sawi a ni.

Communist Party of India-Marxist politburo member, Sarkar chuan presi­dential government siam a nih chuan India federal structure chu a sawi danglam vek tur thu leh India Constitution pawh a thlak danglam vek tur thu a sawi. National Institute for Transforming India (Niti) Aayog hmangin he a thiltum hi a kalpui mek a ni, a ti. Planning commission tih­tawp a nih a, NITI Aayog kalpui a nih aṭang khan state leh sorkar laipui inzawmna ṭhenkhat chu a nghawng nasa hle nia sawiin, central aṭanga fund dawn ṭhin pawh a nghawng thu a sawi a, hei hian India federalism a tihbuai thu Sarkar chuan a sawi.

Tripura Chief Minister chuan Goods and Services Tax (GST) in ram economy dinhmun a tihchhiat thu leh small industry leh loneitute eizawnna a tihchhiat thu a sawi a, GST chuan mi retheite a nghawng ber thu a sawi bawk.

Kum 2016, November 8-a BJP kaihhruai sorkarin pawisa note lian pahnih a tihthih chu mi rethei tam tak tana harsatna siamtu a ni, a ti.