Tripura-ah BJP leh Congress worker intibuai

Tripura-a Sepajijhala district-ah Ningani khan Congress party leh rorellai BJP worker-te an intibuai a, police-ten Congress worker pali an man.

Congress party chuan Nilaini tlaia Sepahijhala district-a Routkhola-a an party flag an tar laiin BJP mi leh saten beiin, an party office pawh an hal a, Congress worker pathumin hliam an tuar a, an zinga pakhat chu GBP hospital-ah dah luh a ngai a ni. He thil thleng hi an hriatin Congress worker ṭhenkhat chuan BJP worker-te an bei zui a, hliam tuar pawh an awm niin BJP chuan an sawi ve bawk.

Ningania party pahnih worker intibuaite hnawhdarhna atan hian police-te chuan tear gas te hmangin, van lam hawiin silai pawh an hmetpuak tih an sawi. Pungkhawmte hian police-te hi lungin an tawng bawk nia sawiin, Bishalgarh police station officer in charge, Badal Chandra Das chuan, "Police mite leh vantlang thilte an beih avangin Congress supporter 17 lakah complaint ziahluh a ni a, an zinga pali chu man an ni," tiin a sawi.

Tripura Pradesh Congress Committee (TPCC) president Birajit Sinha chuan Routkhola-a Congress worker-te beih an nih hmasak dan chu a dem thu a sawi a, "Kan party office halin, kan worker-te chu BJP supporter-te chuan an bei a ni. Hetih laia police lamin pawikhawihtu lam zawk ṭan a, Congress worker-te chunga action an la hi a rilru nat thlak hle a ni, " a ti.

Eptu party dang, CPI (M) chuan BJP mi leh saten Congress office an bei chu an dem thu sawiin, "Rorellai BJP hian kum li leh a chanve zet chu CPI(M) te bitumin an bei a, tunah Congress worker-te an bitum chho leh a ni," tiin Tripura-a boruak muanawm a awm an duh thu a sawi.