Manipur : Vawiin aṭangin Textile Expo ṭan dawn

Manipur sorkar chuan vawiin aṭang hian ‘Manipur International Textile Expo’ (MANITEX) 2022 chu Urban Haat, Nilakuthi-ah a buatsaih dawn a, November 15 thleng a awh ang.

Expo neihna tur hmun hi Textiles, Commerce & Industry minister Nemcha Kipgen chuan a endik hmasa a, Manipur Industrial Development Corporation (MANIDCO) chairman Kongkham Robindro Singh chuan a ṭawiawm a ni.

MANITEX 2022-ah hian stall 124 a awm dawn a, heng zingah hian international stall 10 leh state dang aṭangin stall 10 a tel ang. He Expo in a tum ber chu handlooms, handicrafts, dyeing & printing, power loom, garment, embroidery leh costume-te a zau thei anga phochhuah a, state chhunga textile industry tihhmasawn a ni. He exhibition peng pakhatah hian tualchhung thil siamte phochhuah leh, textile industry lama entrepreneur-te chawikanna turin MANITEX Fashion Week hman tel a ni bawk ang.