Tripura : CPI(M) leh BJP worker-te intihbuainaah mi 9 an hliam

Tripura state-a rorellai party, BJP leh Congress party worker-te inkara buaina a chhuah hnuah, Inrinni zan khan eptu party dang, Communist Party of India-Marxist(CPI-M) leh BJP worker-te an intibuai leh a, mi pakua in hliam an tuar.

Inrinni zan khan state khawpui, Agartala aṭanga km 30 vela hla, Karoilong-ah CPI(M) hruaitu leh worker-te chuan meeting an nei a, meeting neih lai hian BJP mi leh sa nia sawi mi ṭhenkhatin CPI(M) activist-te hi an rawn bei a, anni hian lo bei let vein an intibuai zui ta a ni, tiin Teliamura sub-dvisional police officer (SDPO) Prasan Tripura chuan a sawi.

Buaina chhuak vang hian mi pakuain hliam an tuar a, CPI(M) rally neihnaa venhim hna thawk tura dah police dah zinga pahnih chu hliam tuar zingah hian an tel. Hliam tuarte hi Teliamura hospital-ah hruai nghal an ni a, hliam na zual, CPI(M) activist pathum chu Agartala-a GBP Hospital-ah refer an ni.

SDPO chuan Karoilong-a buaina chhuak kaihhnawihah hian thubuai ziahluh nghal a nih thu a sawi.

CPI (M) hruaitute chuan rally an neih laiin BJP thlawptu mi 10/12 velin pungkhawmte chu rawn beiin, an worker ṭhenkhatte kut an thlak bakah dawhkan leh chair-te pawh an tichhia tih an sawi. An rally neihnaa BJP mi leh saten buaina an chawk chhuak chu an dem thu leh, buaina siamtute a rang thei anga man an phut thu an sawi a ni.

Hetih lai hian BJP chief whip, Kalyani Roy chuan Karoilong bula BJP worker-ten rally an neih chu CPI(M) lam hian an tibuai hmasa niin a sawi a, CPI(M) ten an beihna avangin an party worker parukin hliam an tuar a ni, a ti. Roy chuan Teliamura police station officer-in-charge pawh an hmu tawh tih sawiin, BJP worker beitute laka hremna lek kawh ngei an phut tih a tarlang.