President Murmu-i'n hmarchhak state 3 tlawh zo ta

President Droupadi Murmu chuan ni li thanga hmarchhak state pathum - Nagaland, Mizoram leh Sikkim a tlawh kual hnuah, Inrinni tlai khan Delhi lam a pan leh ta.

President hian Nagaland state a tlawh hmasa ber a, a dawtah Mizoramah kalin, kar liamta Zirtawpni khan Sikkim a thleng a ni.

West Bengal kaltlanga Sikkim leh ramchhung hmun dangte inkalpawhna, km 1.13 a thui Atal Setu chu President hian a hawng a, hei bakah virtual-in East leh South district-a state leh central project eng emaw zat lungphum a phum bawk.

Inrinni khan Solophol Hill-a Siddheswara Dham-ah kalin self help group (SHG) hrang hranga hmeichhe member 30 te a kawm a, temple prayer hall-a Raddi/Lukuni weaving, Thanka painting, carpet leh handloom weaving exhibition an neih chu a enpui nghal bawk a ni.

A hun hman zawhah President hian Namchi aṭangin Delhi lama haw turin Bagdogra airport, West Bengal a pan a ni. Chief minister Prem Singh Tamang leh senior official-ten Namchi airport aṭangin an thlah liam a ni.