Meghalaya HC-in Parliamentary Secretaries Act paih

Meghalaya High Court chuan Ningani khan thuchhuah siamin, state sorkarin parliamentary secre­tary a ruat chu dan kalh a ni tiin a ruat theihna dan chu a hlip a, mahse he post paihna tur erawh Governor kutah a dah thung.

He thutlukna hi Chief Justice Dinesh Maheshwari leh Juctice Ved Prakash Vaih-te kaihhruai divisional bench siam a ni. Bench hian Madal Sumer-a'n parliamentary secretary ruat chu ram danpui pel leh dan kalh a ni, tia PIL a thehluh ngaihtuah a nih hnuah he thutlukna hi an siam ta a ni.

Meghalaya Parliamentary Secretaries (Appointment, Salsries, Allowances and Mis­cellaneous Provisions) Act, 2005 chu state Legislature-a legislative thuneih duhna ni theia a lan avangin hnawl a ni a, he Act hi paih a ni, tiin bench chuan thuchhuah an siam .

Thutlukna siam a nih hnu lawkah hian Parliamnetary Secretary 17 chu an hna aṭang hian an bang nghal a, Chief Minister Mukul Sangma pawhin an banna hi a pawm a ni.

Hetih lai hian CM chuan parliamentary secretary ruat a nih chhan chu a sawifiah thung.

July 26 khan Supreme Court chuan Assam in 2004-a Minister of State rank-a Parliamentary Secretary a ruat chu ram danpui kalh a nih thu a lo sawi tawh bawk.

Apex Court bench Justice J. Chelameswar, Justice R.K Agra­wal leh Justice AM Sapre-te awmna bench chuan Assam Parlia­mentary Secretaries (Appoint­ment, Salaries, Allowances and Miscellaneous Provisions) Act, 2004, pawh dan kalh a ni tiin an lo hlih sak tawh bawk a ni.

March 12, 2013 khan Megha­laya Chief Minister Mukul Sangma chuan Parliamentary Secretary 18-te hi rinawmna thutiam tirin lakluh an ni a, Congress in Assembly inthlana hnehna an chan hnu lawkah minister 12-te ṭanpui tura ruat an ni. Member 60 awmna, Meghalaya assembly inthlan hi kumthar February- March velah neih tura ruahmanna siam a ni tawh bawk.