US Army te'n Indopui II-naa sipai thite ruang zawng dawn
US-a Defense POW/MIA Accounting Agency-te chuan Arunachal Pradesh-ah Indopui II-na hunlaia US sipai, chin hriat loha bo ta te ruang zawn hna a chhunzawm dawn.
Kum kalta khan DPAA team te hian thla khat chhung chu India rama Indopui laia a sipai chin hriat loha bo te zawn hna hi a lo kalpui tawh a, tuna an lokal leh tur hi 2013 hnu lama US in a sipai zawn hna a kalpui ṭum ngana tur a ni dawn a ni.
US Consulate General Office, Calcutta chuan thuchhuah a siamah US sipai 400 vel chu Indopui II-na lai khan India hmarchhaka Himalaya tlang leh a chhehvelah hian chin hriat loha an bo thu a tarlang. Indopui lai hian US hian China sipaite chu Himalaya tlang paltlang hian an mamawh a pe ṭhin a, hetih lai hian thlawhtheihna eng emaw zat chu henglai velah hian an bo a, tun thleng hian hmuh an la ni lo.
2015 leh 2016 DPPA mission kalpui a nih lai khan ruang chambang eng emawzat hmuh a ni a, heng ruang te hi DNA test kalpui mek a nih thu an thuchhuah chuan a tarlang. Heng zinga pakhat chu US Sipai, Air Force 1st Lt. Robert E. Oxford a ni tih hriat a ni tawh a ni.
Kumin hian 2016 kuma an zawn lohna lamah an zawng dawn niin an sawi a, US lam chuan India nen inlaichinna ṭha tak neih a nih vangin an sipaite ruang an zawnna kawngah pawh hian India sorkar in theihtawpa a ṭanpui an beisei thu an sawi.