Corruption do turin Police-te zalenna kan pe : Assam CM

Assam Chief Minister Sar­bananda Sonowal chuan corruption do na kawngah police te chu zalenna a pek thu a sawi a, an duh ang taka hma lak pawh phalsak an nih thu a sawi.

Sonowal chuan, "Corruption do na kan ṭan tawh a, kan chhun­zawm zel dawn a ni," a ti. CM chuan corrpution-a inhnam­hnawih reng reng chu an lakah action lak a nih zel tur thu a sawi bawk.

Assam CM hian Assam Public Service Commision(APSC) scam avanga officer eng emaw zat a man hnuah he thuchhuah hi siam a ni a, Nilaini khan Assam Civil Service, Assam police service leh officer dang eng emaw zat chu thamna pek avangin Assam Police-te hian an man a, an zingah hian APSC chairman hlui pawh a tel a ni.

Assam police te hian an mi rinhlelh mi 25 te kutziak chu forensic department in vawi ruk lai an enfiah hnuah an exam chhanan lehkha chu a lem a nih thu an chhuichhuak a, hemi kaihhnawihah hian mi 18 an man tawh a ni. An la man loh te pawh hi chhuizui an nih mek thu Police thuchhuah chuan a lo tarlang tawh bawk.

Heng an mi man te hian hna an hmuh theih nan hian thamna cheng nuai 15 aṭanga cheng nuai 30 inkar vel an pek thu Police thuchhuah chuan a tarlang.