Raj Medicity-in Manipur-ah multi-speciality hospital din dawn

Raj Medicity chuan Manipur khawpui, Imphal-ah cheng vaibelchhe 130 sengin multi-speciality hospital a din dawn.

Chief minister N Biren Singh chuan Pathianni khan Khurai Chingangbam Leikai, Imphal East-ah hospital dinna tur lungphum hi a phum a ni. He hunah hian Raj Medicity chairman leh managing director H Rajen Singh, works & youth affairs and sports minister Govindas Konthoujam, health minister Dr Sapam Ranjan Singh, PHED minister L Susindro Meitei, MLA leh sorkar official dangte an tel.

CM Singh chuan a kaihhruai sorkar chuan health leh education sector chu a ngai pawimawh in, hmasawnna turin theihtawp a chhuah reng tih a sawi. JNIMS-a MBBS seat chu 100 aṭangin 150-ah tihpun niin, Churachandpur Medical College-ah MBSS seat 100 awm nen, an state chuan kum khatah MBBS 500 vel an chher chhuak thei dawn tih a sawi a, hei hian doctor lam indaih lohna pawh a phuhru thei dawn a ni, a ti. Prime minister Narendra Modi-a'n ram chhunga district tina Medical College din tura hma a lak angin, state sorkar pawhin district dangah medical college hi din belh zel a tum tih a sawi.

Covid-19 hri len laia doctor leh damdawi lama thawktute inpeknate fak in, hri leng do hneh a nih theihna kawngah an thawh hlawk hle a ni, a ti. Mi tam tak nunna chhanhim a nih theihnan private hospital-te inpeknate pawh theihnghilh a ni lo ang, tiin a sawi. Doctor leh medical staff-te chu an mipuite tana an pawimawh thu sawiin, an hnathawhna kawngah nungchang mawi tak leh, an mawhphurhnate hriaa thawk zel turin a chah bawk a ni.

Raj Medicity MD H Rajen pawhin thu sawiin, kum 2004 khan khum 34 chauh awm theihna, Raj Polyclinic din a nih thuleh, kum 2014-ah khum 150-ah tipungin, Raj Medicity hospital tia thlak a nih thu a sawi. Hospital hian state mipuite hnenah healthcare service ṭha peknaah pawh dinhmun pawimawh tak a chelh a ni, a ti. Khum 400 awmna tur, Raj Medicity Multi-Speciality Hospital chu Rs vbc 130 sengin siam a ni dawn a, kum hnih velah zawhfel hman an tum tih a sawi.

Raj Medicity hospital-ah hian staff 600 an awm mek a, multi-speciality hospital din a nih hunah chuan mi 1,500 vel chhawr an ni dawn tih Rajen chuan a sawi bawk.