Assam inthlan aiin Naga buaina chinfel hi kan dah pawimawh zawk : Rio

Nagaland chief minister Neiphiu Rio chuan nakkuma state assembly inthlan neih tur aiin, Naga buaina chinfel chu an party, Nationalist Democratic Progressive Party (NDPP) chuan a dah pawimawh zawk tih a sawi.

Chief Minister Rio hian kar liam taa an state tlawhtu, president Droupadi Murmu hnenah pawh Naga buaina chinfel thuai a nih theihna atana hma lak pui turin a lo ngen tawh bawk.

Naga nationalist-te chuan kum 60 chuang zet chu Nagaland bakah Manipur, Assam leh Arunachal Pradesh-a Naga chenna bialte huam vekin Naga inrelbawl hranna siam tumin an bei tawh a ni. Mahse an ṭhenawm state-te chuan an state khawih tel a, Naga chenna bialte chhunfin vek tumna hi an dodal thung.

Sorkar laipui leh Naga helpawlte chu inremna kawng zawngin kum tam tak inbe tawhin, inremna tluantling an la siam thei lo. Naga armed group lian ber zinga mi, National Socialist Council of Nagalim (Isaac-Muivah faction) chuan inbiakna hi hun eng emaw chen an tihtawp hnuah kumin September thla aṭang khan inbiak chhunzawm leh hi a remti a ni. Kum 18 chhungin NSCN-IM leh sorkar laipui hi ṭum 80 chuang remna zawngin an inbe tawh. Mahse NSCN-IM in Naga flag leh constitution hran an ngiat chu sorkar laipui hian a pawmpui thei lo a ni.