Tripura : TIPRA-in Delhi-ah nawrh huaihawt an tum

Tripura-a TIPRA party chuan December 1 hian New Delhi-a Jantar Mantar-ah nawrh huaihawt an tum.

TIPRA party chuan Tripura leilung fate thuam chakna tura an thil phut nawrna atan nawrh huaihawt hi an tum tih an sawi. Delhi-a hun an hman hma hian November 12-ah Tripura khawpui, Agartala-a Swami Vivekananda field-ah rally an huaihawt hmasa dawn a ni.

Agartala-a rally an neihah hian an thil phut hrang hrangte an tarlan bakah, state assembly inthlan neih tur atana an party tuaitharna hun an hmang nghal dawn a ni. Party chairman Pradyot Debbarman chuan assembly inthlan lo awm turah, tribal-te harsatna chinfel intiam duh lo party dang thawhpui an tum lo tih a sawi.

Tripura-a rorellai BJP chu sawiselin, Pradyot chuan, "Mipuite rilru tibuai turin ADC area-ah hmasawnna hna leh eiruk do hna an thawk nia sawiin, dik lo takin an campaign leh mek a ni," a ti. Tripura High Court-in a hriattir hnuah pawh state sorkar chuan ADC area-ah tun thlengin Village Committee inthlan a la buatsaih duh lo a, hei hi BJP an chak dawn loh tih an hriat vang a ni, a ti.

"BJP hian democratic system leh norms hi an kalpui ve lo a, hei hi Tripura mipuite hian an duh lo ni. Inthlan neih dawna an thutiam hrang hrangte an tihhlawhtlin loh avangin, nakkuma assembly inthlanah mipuite chuan an thiltih chhanna an pe ngei dawn a ni," tiin a sawi.