Jantar Mantar-a Article 371F duh lohna lantirtu an man

Sikkim state tana special status pekna, Article 371F duh lohna lantirtu, Bihar mi Sumanta Kumar chu Sikkim Police-ten Delhi-ah an man.

Sumanta Kumar hian August 22 khan Jantar Mantar, New Delhi-ah Article 371F duh lohna hi a thurualpui ṭhenkhatte nen an lantir a, an thiltih hian Sikkim mipuite a tilungawi lo hle.

Article 371F dodalna lantir chungchang hi Sikkim chief minister Prem Singh Golay chuan September thlaa Assembly rorel inkhawmah pawh a sawichhuak a ni. Hemi chungchanga Sikkim Mulbasi Suraksha Samiti-ten FIR an thehluh chu Sikkim police-te chuan bawhzuiin, Jantar Mantar-a nawrh huaihawttu ber Sumanta Kumar hi man tumin an zawng nghal a, state paliah an zawn kual hnuin November 1 khan Delhi-ah an man tih an sawi.

Sikkim police-ten Kumar hi thu an zawhfiahnaah, Sikkim lamah thurualpui panga a nei tih a sawi. Heng mi pangate pawh hi thu zawhfiah mek an ni tih politce-te chuan an sawi bawk.