Kum 2021-a Assam Rifles-te ambush-tu zinga mi hel 1 man

National Investigation Agency (NIA) , Assam Rifles leh Manipur-a Imphal East district police joint team chuan kum 2021-a Assam Rifles commandant convoy ambush-tu zinga mi, Manipur Naga People's Front (MNPF) hel pakhat an man.

Joint team-ten special operation an neihah, Machukring Zamshim Shimray, 'Ningkham' tih bawk hi Imphal East district-a Yaingangpokpi junction-ah an man a ni. NIA chuan 'Ningham' lu manah hian Rs nuai 4 a lo phal tawh bawk.

Kum 2021, November 13 khan Assam Rifles 45th battalion-a commanding officer colonel Viplav Tripathi, a nupui leh an fapa bakah AR sipai palite chu Churachandpur district-a S Sehken khaw bulah helhoin ambush-in an kaphlum a, sipai dang parukin hliam an tuar bawk. Helpawl pahnih, People's Liberation Army (PLA) leh MNPF chuan he pawikhawihna hi an pawl tih niin an chhal ve ve a ni.

NIA chuan he pawikhawihna thleng hi chhuiin, nikum November 27 khan case a ziaklut.

Ningkham hian kum 2016-ah MNPF hi zawmin Myanmar-a Thumol-ah thla thum chhung military training a neih thu a sawi niin police-te chuan an tarlang. MNPF-ah hian self-styled corporal a ni mek a ni. Central security force-te beihnaah pawh a lo inhnamhnawih fo tawh a, kum 2020, July 29-a Chandel-a Assam Rifles ambush-naah pawh khan telin, hemi ṭum hian sipai pathum an thih bakah mi dang parukin hliam an tuar bawk.

Manipur-a sipaite beihna thlenga thi an tam ber ṭum chu kum 2015-a Chandel district-a Paraolon khuaa ambush an nih kha a ni a, sipai 20 an thi a ni.