Manipur : Meitei tana ST status phûtna Minister-in a thlawp

Manipur works minister Govindas Konthoujam chuan Scheduled Tribe Demand Committee of Manipur (STDCM)-in Meetei/Meitei hnam tana Scheduled Tribe status an phût chu a thlawp thu a sawi.

STDCM member leh an thil phut thlawptu civil organisation hrang hrang aiawhte chuan Meetei/Meitei-te ST status pek phûtin Manipur MLA leh minister hrang hrangte an lo hmu tawh a ni. Works minister Konthoujam pawh hmuin, memorandum an thehlut nghal bawk.

Minister chuan STDCM member-te nena an inkawmnaah, an thil phut chu a thlawp thu leh, Meetei/Meitei hnam chu ram danpui behchhana venhimna pek a ṭul thu leh, party hrang hrangte pawhin an thil phut chu thlawp se a duh thu a lo hrilh.

Konthoujam chuan, "Meetei/Meitei-te ST list-ah telh a nih hian tlang mite dinhmun leh chanvo a khawih danglam dawn lo a, state chhung hnam hrang hrangte zingah inlungrualna leh chakna a siam zawk dawn a ni," a ti. An thil phut chu thil ṭha tak a nih avangin state sorkar pawhin a a remtihpui ngei a rin thu a sawi bawk.

STDCM hian an thil phut nawrna atan hian ṭum eng emaw zat nawrh an lo huaihawt tawh a, mahse tun hnaiah an tihdan thlakin minister leh MLA-te an kalchilh a, an thil phut chungchagnte hi sawipuiin memorandum an thehlut nghal zel a ni.