Assam-a zirna inte September thlaah hawn theih beisei
Assam health and education minister Himanta Biswa Sarma chuan hripui leng vanga an state chhunga zirna in kharte chu September thlaah hawn theih a nih tawh an beisei thu a sawi.
Guwahati-a chanchinthar lakhawmtute a kawmnaah, minister chuan state chhunga Covid-19 leng chu September thlaah a ziaawm tawh an beisei tih sawiin, hei vang hian zirnate pawh chhunzawm chhoh theih a beiseiawm tiin a sawi a ni.
March thla aṭang khan school, college leh university te chu khar an la ni a, mahse 'online teaching' mode hmanga class erawh lak chhunzawm a ni thung. Mahse hei hi thingtlang leh hmun kilkhawr zawkah te kalpui theih a nih loh avangin zirlai naupang tam takin an zawm ve thei lo a ni.
Assam state-ah hian hri kai hi an la pung chak hle a, hri vanga thi pawh an pung zel. Thawhṭanni khan hri kai hmuh thar mi 1,348 awm lehin, an zinga 155 chu Guwahati khawpuia mi an ni. Thawhṭanni vek khan Covid-19 vanga thi mi pasarih sawm belh lehin, he hripui thihpui hi mi 86 an awm tawh. State puma hri kai hmuh chhuah tawh hi mi 33,576 an tling tawh a, an zinga mi 24,040 chu enkawl dam an ni tawh thung.