NEIGRHIMS-ah hri kai 10 hmuh belh

Meghalaya-ah Thawhṭanni khan hri kai 36 hmuh belh leh an ni a, an zingah hian NEIGRHIMS-a mi 10 an tel. 

NEIGRIHMS Director Dr. Prithwis Bhattacharya chuan an hospital-a hri kai hmuh thar zingah mi pakuate chu inkhung hrang mekte an ni a, pakhat erawh chu orthopeadic ward-a security guard a nih thu a sawi. Security guard tih loh midangte chu taksa lama harsatna nei lo, asymptomatic vek an ni. 

Meghalaya-a eptu party, Congress party chuan NPP kaihhruai, MDA sorkar chu Covid-19 kai te hming a thup avangin an sawisel. Congress party hian hri kai hmuh chhuahte chu midang an hnimhnaih tawh leh kaichhawn theihte awlsam zawka zawn chhuah a nih theihna turin an hming puangzar zel turin sorkar a lo ngen tawh a, mahse sorkar hian a la puang duh lo a ni. 

Congress thupuangtu leh MLA Zenith Sangma chuan hripui leng mek do hna chu state sorkar tih chauh ni loin, state mipui tinte hna a ni tiin, mipuite hriselna leh himna chu ngaih pawimawh a ni ber tur a ni, a ti. Hetih lai hian sorkarin hri kai hmuh tharte a puan chungchangah chanchin kimchang a puang tel ngai lo a, tute nge hri kai hmuh tharte chu mipuite an hriat loh avangin invenna leh fimkhur dan tur pawh hriat­thiam a har ṭhin a ni, a ti.