Tripura MLA paruk-in BJP MLA nih dil

Tripura-a Trinamool Congress (TMC) Members of Legislative Assembly (MLA) parukte chuan Tripura Assembly speaker, Ramendra Chandra Debnath chu lehkha pein, Bharat Janata Party (BJP) MLA a pawm turin an ngen.

MLA paruk - Diba Chandra Hramkhawl, Sudip Roy Barman, Asish Saha, Pranjit Singha Roy, Dilip Sarkar leh Biswa Bandhu Sen-te chuan speaker hi hmuin, TMC nena an inzawmna zawng zawng an chhut chah thu leh BJP an zawm tawh thu an hrilh a, lehkha pe nghalin an lehkhaah hian BJP MLA a pawm tura dilna a inziah thu tarlan a ni.

MLA paruk-te hian August thla khan BJP hi an zawm tawh a, hemi a nih avang hian speaker hnenah hian dan ang taka BJP MLA nih an dil thu an tarlang. Speaker chuan BJP MLA a pawm an nih theih nan hian dan hrang hrang zawm tur a awm thu a sawi a, assembly secretary hmun danga a awm rih avang leh kar leha assembly session ṭan a nih dawn chauh thu sawiin, an dilnate hi tihhlawhtlin a nih a Treasury Bench-te'n an thu an ngaithla duh a nih chuan BJP MLA hi an nih theih dawn a ni, a ti.

Legislator paruk te hi Tripura Assembly inthlanpui 2013 khan Congress party ticket-a thlan tlin an ni a, 2016 June khan Trinamool Congress hi an zawm a ni. Tripura-ah hian MLA seat 60 awmin rorel lai Left Front hian member 51 an nei a, Congress-in 3 neiin, BJP hian 6 an nei thung a ni.