Meghalaya-ah Wangala Festival hmang

Maghalaya-a an Dance festival lian ber 'Wangala Festival' chu Ningani khan Garo Hills-ah ṭan a ni a, Inrinni khan zawhfel a ni.

Wangala Festival hi '100 Drums Wangala Fes­tival' tia sawi a ni bawk a, Garo hnamte festival pawimawh tak niin, Tura khaw bul Asanang-ah hman a ni.

He festival-ah hian naupang aṭanga kum upa lam thlengin an fuankhawm a, kum danga an lo kalpui ṭhin tawh ang bawkin, Songsarek lifestyle phochhuahna hun atana hman a ni. Garo hnam zingah hian Christian ni ve lem lote chu 'Songsarek' tih an ni. Wangala Festival hi Garo pathian hnena lawmthu sawina hun atana hman a ni ṭhin a, an pathian Misi Sajong, Pattigipa Ra'rongipa-a'n thlai thar ṭha tak tak a pek avanga an lawmthu sawina ni.

Festival organising committee member Seme­ri Alva B. Sangma chuan hun rei tak ata tawh he festival hi kalpui a nih tawh thu a sawi. Garo hills a christian khua ni lo chuan he festival hi an hman vek thu leh, Garo culture humhim nan leh ram leilung humhalh nana hman a nih bawk thu a sawi.

Garo Hills Auto­nomous District Council (GHADC) chief executive member (CEM) Boston Marak chuan he festival hawnna hun hi a hmanpui a, hawnna program-ah hian mi tamtak an tel a ni.

Wangala festival hi kum 1976 aṭang khan kumtin favang laiin an hmang ṭhin a ni.