Tripura-ah hri kai 4,000 chuang tawh

Tripura state-ah nimin khan Covid-19 kai mi 147  hmuh chhuah belh lehin, anni nen hian hri kai hmuh chhuah tawh hi mi 4,066 an awm tawh. Nimin khan sample 4,027 test a ni a, heng zinga 147 chu an positive a ni. Hri kai hmuh tawh zinga 2,467 chu an dam tawh a, mi 17 in an thihpui tawh thung. Enkawl mek mi 1,564 an la awm. 

Law minister Ratan Lal Nath chuan kar liam ta Zirtawpnia hri kai enkawl mek zinga ṭhenkhat, West Tripura district health officer Dr Sangita Chakraborty lo hau a, chil lo chhak khumtute chu hrem an ni dawn tih a sawi. Minister chuan Covid-19 positive enkawl mekin on-duty health worker lo tinawmnah a, mawi lo taka a chunga a che chu a dem hle tih sawiin, health worker-te chunga mawi lo taka chete chu sorkarin a dim dawn lo tih a sawi. He thil thlenga inhnamhnawihte hi positive enkawl mek zinga pathum an nih thu a sawi bawk. 

Tripura sorkar chuan an state-a hri darh tur venna kawng khat atan medical team hmangin khaw hrang hrangte dinhmun a endik tir mek a, hetih lai hian Mungiakami ADC khuaa Covid-19 test neih sak tura kal medical team-te chu khawchhung miten an lo dang. Mungiakami khaw mite chuan medical team-te luhna tur hi lo dangin, an khuaah Covid-19 kai an awm lo tiin an lo au a ni. Hri kai an awm loh avangin mask vuah ngai an tih loh thute sawiin, test neih saktu tur doctor leh medical team member dangte chuan hri an lakluh an hlau zawk avangin an khuaa luh an remti lo tih an sawi. Hei vang hian khawchhung mite endik thei loin medical team hi an let leh a ni.