Hmarchhak biala khua zawng zawngah Dec 2023-ah 4G network dah hman vek tum a ni : Rijiju

Union minister Kiren Rijiju chuan kum 2023, December thlaah chuan hmarchhak biala mihring chenna khua zawng zawngah 4G network neihtir hman vek tum a nih tih a sawi.

Thawhlehnia hmarchhak biala 4G mobile service-na tur project thlira New Delhi-a meeting neihah Rijiju chuan he thu hi a sawi a ni. Minister chuan telecom lama inthlakna a thleng mek a, hmun kilkhawr ber pawh thlunzawm vek an ni tur a ni tih chu prime minister Narendra Modi-a thupui a ni, a ti. Meeting-a hian telecom lam official-te bakah Armed Forces official-te pawh an tel.

Union Minister of Law and Justice chuan kum 2023 December thlaah hmarchhak biala khua zawng zawng leh border area-te chu 4G network hmanga thlunzawm vek an ni tawh tur a ni, a ti.

Sorkar laipui chuan kumin February thla khan India rama thingtlang khaw 5,97,618 zingah 25,067-ah mobile leh internet service a la awm lo tih Parliament-ah a sawi. Heng zinga khaw 11,000 chu Universal Service Obligation Fund (USOF) scheme hnuaiah dah an ni. USOF hi thingtlang khuaa mobile connectivity pekna tura kum 2002-a siam a ni. He scheme hnuaia dah tel loh khaw dangte chu Government and Telecom Service Providers (TSPs)-in a tahtawlin connection hi a pe chho mek bawk.