AP : Donyi Polo Airport tan flight booking hawng ṭan

Arunachal Pradesh airport thar, Donyi Polo Airport chu December 1 aṭangin hman ṭan a ni dawn a, IndiGo Airlines chuan Thawhlehni aṭang khan flight booking a hawng ṭan.

December 1 hian commercial flight hmasa ber chu Kolkata-Donyi Polo Airport-ah thlawh tir a ni dawn a, Kolkata aṭangin chawhma dar 11:05-ah chhuakin, chhun dar 12:35-ah AP hi a thleng ang. Chawhnu dar 1:05-ah Kolkata lam panin a thlawk chhuak leh dawn a ni.

IndiGo chuan Donyi Polo Airport hi an domestic destination 75-na tur a ni tih sawiin, tunah hian ram chhungah nitin flight 1,600 leh international-ah flight 26 a service tir mek.

Donyi Polo Airport hi November 17-ah prime minister Narendra Modi chuan a hawng dawn a, October 18 khan Airbus A320 chuan hlawhtling takin test landing a lo nei tawh a ni.