Sikkim : SKM-in SDF hruaitu bang turin phut

Sikkim state tana special status pekna, Article 317F duh lohna lantir avanga man, Bihar mi Sumanta Kumar thlawptu nia puh, Sikkim Democratic Front (SDF) thupuangtu JB Darnal chu bang turin Sikkim Krantikari Morcha (SKM) chuan an phut.

Gangtok-a press conference an neihah, SKM thupuangtu Jacob Khaling chuan SDF thupuangtu bakah SDP leader Pawam Kumar Chamling chu Sikkim mipuite rilru tinatu leh, an dikna chanvo humhalhna tur dodaltu an thlawp avangin SDF party aṭangin bang turin an phut tih a sawi.

Hetih lai hian Darnal chuan Jantar Mantar-a thil thlengah inhnamhnawihna engmah a neih loh thu leh, a inrawlh ve nia sawi chu SKM party leh Kumar-te ruahman vek niin a sawi thung. "Kumar hi biakpawh ka tum ngai lo a, a thiltih hi social media lamah na takin ka dem zawk a ni. Kei leh kan party President hian inhnamhnawihna engmah kan neih loh avangin kan bang dawn lo. Sikkim mipuite rilru tina zawngin eng thil mah kan ti lo. Dik tak chuan Kumar-a thiltih hi demna thuchhuah siam hmasa ber ka ni zawk a ni," a ti.

Sumanta Kumar hi Sikkim police-ten man tumin hun eng emaw chen an zawn hnuah, November 1 khan Delhi-ah an man a ni. Police-te chuan thu an zawhfiahnaah Kumar hian Sikkim-ah thurualpui panga a nei niin a sawi thu an tarlang.